Tuesday, March 25, 2008

الضمير العربى

من كام يوم كدة و انا بقلب فى قنوات التليفزيون ، و دى حاجة ماعدتش بعملها كتير، يالصدفة شفت اغنية شدتنى ، كانت الاغنية بتتغنى على خلفية من مشاهد ..مش هقول بس الظلم و العدوان اللى العرب بيتعرضوا له ، لكن ممكن اقول مشاهد نكسة العرب ، لان بعض المشاهد كانت بتعبر عن خلافات عربية عربية بحتة.....

المغنيين كتير ، من كل الدول العربية تقريبا ، و كلهم لابسين اسود ، و كلهم زعلانين و منفعلين ، و المشاهد فى الخلفية صادقة قوى و معبرة قوى..........

فكرنى شوية باوبريت الحلم العربى من اكتر من 10 سنين ، و ان كان الاوبريت الاول بيقول : يلا نحط ايدينا فى ايدين بعض عشان النهضة ، التانى بيقول مامعناه : حسوا على دمكم بقى.....

كل ده جميل و حلو ، لكن المشكلة بعد ماخلص (الاوبريت/الاغنية) لقيت تنويه بصوت رخيم :حصريا على قناة زووم .....زوووم ......مزيكا ..............عالمكشوف ، وكملت التنويهات و الاعلانات عشان تفكرنى باللى كنت نسيته ، و هو انى بتفرج على قناة زووم بتاعة الاغانى المملوكة لمحسن جابر...

يعنى هى هياها نفس القناة اللى شغالة طول النهار كليبات ، كليبات لهيفاء وهبى و سواها ، و اعلانات عن احدث الرنات و النغمات ، و ارقام الشات فى الدول المختلفة ، ولو عايز رسالة على الخاص ابعت على الرقم ده ، و تنويهات القناة نفسها على ماأتذكر كانت كلها بتعتمد على نفس فكرة الكليبات اللى بتذاع عليها طول النهار.....

و المغنيين اللى بيغنوا ......مش هما هماهم نفس المغنيين اللى بقالهم سنين و سنين مابيغنوش الا عن الحب و الشوق و الهيام ؟؟؟؟ مش دول اللى بينزلوا اغانى جديدة فى الفلانتاين ، عشان الشباب اللى بيحتفل محتاج اغانى للمناسبة دى؟؟؟؟ مش الممثلين اللى اشتركوا فى العمل هما هماهم الممثلين اللى بيعملو اعمال هايفة بتزيد من الانحطاط الفكرى و الاخلاقى عند الناس؟؟؟؟؟

قلت جايز اخيرا ربنا هدى المسئولين عن القناة و قرروا يحترموا نفسهم..............لكن ابدا........الكليبات لسة شغالة زى ماهى ، و الاعلانات و الشات.......كل حاجة زى ماهى بالضبط.......

ممكن حد يقول ان حاجة كويسة ان الاغنية تتعرض على قناة زى دى ، عشان كل الشباب يشوفوها..... بس الشباب واخد نفس موقف القناة ....بشوفها ، و يتأثر قوى شوية......و بعدين يكمل حياته عادى جدا ، و يكمل فرجة على الكليبات و شات.

بل بالعكس ، ممكن يحس انه رضى ضميره شوية لما اتفرج على الاغنية دى......

الاغنية بتقول : حاكموا ضميركم....انتم المسئولين عن اللى احنا وصلنا له ده........لازم نتغير....

بس التغيير ده لازم يكون تغيير بجد ، مش مجرد منظر و خلاص ، يعنى لما قناة زى دى تبقى هى اللى تنادى بالتغيير ، و الكليبات و كل مظاهر الانحطاط و التفاهة اللى فيها دى زى ماهى ، و الشباب بيتفرجوا عليها.....تبقى دعوة التغيير دى نوع من انوع التهريج بامانة ، بيفكرنى بالمناظر اللى بقت هى القاعدة فى كل حاجة دلوقتى ، الحجاب عبارة عن طرحة حرير الفها فوق راسى ، التدين عبارة عن صوم و صلاة و بس ، و الوطنية عبارة عن اغنية اسمعها و ارجع زى ماكنت................

3 comments:

tamooh said...

هو ايه اللى خلا الحلم العربى ما يتحققش ..
هو ده
ان الحلم كان اغنية
بس ماحدش غناها غيرهم
وللاسف ..صوتهم ماكنش صادق
صوتهم ماكنش يعبر عن اى حلم
صوتهم كان بعيد..بعيد اوى
وجايين برده من بعيد يصحوا الضمير العربى
..

طب صحوا ضمايركم الاول ..وشوفوا الجرايم اللى بترتكبوها فى حق الشباب

صدقينى يا شموسة..هم الخطر ..هم معاول الهدم
هم اللى ضمايهم عايزة تصحى
!
!

asmaa said...

عندك حق يابطة وعندك حق يااميرة ....يبصوا لنفسهم الاول ...مهما كمان غلطانين والحكام غلطانين وماينعش غلطانين يكلموا غلطانين ومن نفس النوع تقريبا نفس نوع الذنب تحطيم الشباب

الفقيره الي الله said...

عندكم حق فعلا يا جماعه مش هم دول الي هيحرروا الفلسطنيين ولا الي هيجيبوا للامه حقها

بالعكس دول الي جيبنا لورا