Tuesday, March 25, 2008

الضمير العربى

من كام يوم كدة و انا بقلب فى قنوات التليفزيون ، و دى حاجة ماعدتش بعملها كتير، يالصدفة شفت اغنية شدتنى ، كانت الاغنية بتتغنى على خلفية من مشاهد ..مش هقول بس الظلم و العدوان اللى العرب بيتعرضوا له ، لكن ممكن اقول مشاهد نكسة العرب ، لان بعض المشاهد كانت بتعبر عن خلافات عربية عربية بحتة.....

المغنيين كتير ، من كل الدول العربية تقريبا ، و كلهم لابسين اسود ، و كلهم زعلانين و منفعلين ، و المشاهد فى الخلفية صادقة قوى و معبرة قوى..........

فكرنى شوية باوبريت الحلم العربى من اكتر من 10 سنين ، و ان كان الاوبريت الاول بيقول : يلا نحط ايدينا فى ايدين بعض عشان النهضة ، التانى بيقول مامعناه : حسوا على دمكم بقى.....

كل ده جميل و حلو ، لكن المشكلة بعد ماخلص (الاوبريت/الاغنية) لقيت تنويه بصوت رخيم :حصريا على قناة زووم .....زوووم ......مزيكا ..............عالمكشوف ، وكملت التنويهات و الاعلانات عشان تفكرنى باللى كنت نسيته ، و هو انى بتفرج على قناة زووم بتاعة الاغانى المملوكة لمحسن جابر...

يعنى هى هياها نفس القناة اللى شغالة طول النهار كليبات ، كليبات لهيفاء وهبى و سواها ، و اعلانات عن احدث الرنات و النغمات ، و ارقام الشات فى الدول المختلفة ، ولو عايز رسالة على الخاص ابعت على الرقم ده ، و تنويهات القناة نفسها على ماأتذكر كانت كلها بتعتمد على نفس فكرة الكليبات اللى بتذاع عليها طول النهار.....

و المغنيين اللى بيغنوا ......مش هما هماهم نفس المغنيين اللى بقالهم سنين و سنين مابيغنوش الا عن الحب و الشوق و الهيام ؟؟؟؟ مش دول اللى بينزلوا اغانى جديدة فى الفلانتاين ، عشان الشباب اللى بيحتفل محتاج اغانى للمناسبة دى؟؟؟؟ مش الممثلين اللى اشتركوا فى العمل هما هماهم الممثلين اللى بيعملو اعمال هايفة بتزيد من الانحطاط الفكرى و الاخلاقى عند الناس؟؟؟؟؟

قلت جايز اخيرا ربنا هدى المسئولين عن القناة و قرروا يحترموا نفسهم..............لكن ابدا........الكليبات لسة شغالة زى ماهى ، و الاعلانات و الشات.......كل حاجة زى ماهى بالضبط.......

ممكن حد يقول ان حاجة كويسة ان الاغنية تتعرض على قناة زى دى ، عشان كل الشباب يشوفوها..... بس الشباب واخد نفس موقف القناة ....بشوفها ، و يتأثر قوى شوية......و بعدين يكمل حياته عادى جدا ، و يكمل فرجة على الكليبات و شات.

بل بالعكس ، ممكن يحس انه رضى ضميره شوية لما اتفرج على الاغنية دى......

الاغنية بتقول : حاكموا ضميركم....انتم المسئولين عن اللى احنا وصلنا له ده........لازم نتغير....

بس التغيير ده لازم يكون تغيير بجد ، مش مجرد منظر و خلاص ، يعنى لما قناة زى دى تبقى هى اللى تنادى بالتغيير ، و الكليبات و كل مظاهر الانحطاط و التفاهة اللى فيها دى زى ماهى ، و الشباب بيتفرجوا عليها.....تبقى دعوة التغيير دى نوع من انوع التهريج بامانة ، بيفكرنى بالمناظر اللى بقت هى القاعدة فى كل حاجة دلوقتى ، الحجاب عبارة عن طرحة حرير الفها فوق راسى ، التدين عبارة عن صوم و صلاة و بس ، و الوطنية عبارة عن اغنية اسمعها و ارجع زى ماكنت................